Hermann Ingi Gunnarsson skrifar:

Fyrir flesta bændur, hvort sem það eru sauðfjárbændur, kúabændur eða aðrir, eru vormánuðir annasamasti tími ársins.

Það þarf að huga að mörgu fyrir vorið og sumarið. Þeir bændur sem sinna félagsmálum eru einnig mjög uppteknir á þessum tíma enda tími aðalfunda og almennra fundahalda. Kúabændur eru t.d. nýbúnir að halda sinn aðalfund sem haldinn var á Selfossi með miklum glæsibrag. Þeir sem ekki gátu slitið sig frákúnum gátu fylgst með fundinum beint í gegnum Netið og var ég einn af þeim sem nýtti mér það. Þykir mér alveg til fyrirmyndar hvernig að þessu var staðið og þetta fyrirkomulag getur aukið áhuga bænda á þeim málefnum sem verið er að fjalla um á þessum fundum.

Undanfarna daga hefur átt sér stað umræða í fjölmiðlum sem snúist hefur um útflutning og verðlagningu á dilkakjöti í Noregi. Upphaf umræðunnar má rekja til orða Guðna Ölverssonar á Facebook síðu hans um verðlagningu á dilkakjöti í Noregi þar sem hann staðhæfir að hann hafi keypt lambalæri á rúmlega 1000 kr. Íslenskar kílóið. Þakkar hann jafnframt íslenskum skattgreiðendum verðlagninguna á kjötinu í viðtali á Bylgjunni þann 10. apríl og lætur að því liggja að íslenskir skattgreiðendur greiði í stórum stíl niður kjöt fyrir norskan markað. Reyndar var kílóverðið 58 krónur norskrar sem liggur nær 1.300 íslenskum, auk þess sem verðið var tilboðsverð.